LOADING CLOSE

EV車廠品牌銷量排名

[唔係Tesla] 2021一月EV全球銷量#1

Tesla 全球EV銷量Top#1個位,啱啱比一架國產打敗 ! 根據EV -Sales Blogspot 顯示,由2011年以來,全球電動車銷售第一次連續三個月(2020年10月、11月及12月)升一倍 ! 2021年一月數字,比舊年同期亦升112%,果然係好開始 ! 不過全球最受歡迎嘅電動汽車,今次唔係Tesla Model 3啦,比五菱宏光Mini EV首次打低咗。 究竟呢架全球第一係乜野車? 呢架國產EV雙門城市車,四座位但唔夠3米長,非常迷你:長2,917毫米,寬1,493毫米,高1,621毫米。官方話後座摺埋後放得落2個26吋行李箱,都算實用。   咁配置呢?五菱宏光Mini EV搭載13kWh小型電池組的NEDC額定範圍只有120公里至170公里,規格比較弱。外形亦無特別,迷係車一直唔算大賣,能夠撼贏Tesla及所有大牌靠乜?原來係靠國貨嘅強項,一個字 : 平!!  車價只係人民幣28,800元至38,800元,無睇錯,只有Tesla Model 3價格嘅四分之一咋。 淨係平唔夠,更重要係大廠出品有保障。生產五菱宏光Mini EV係由GM China (中國通用汽車),中國上汽集團,柳州五菱汽車嘅巨型合資企業-SGMW生產。去年7月一推出中國市場就爆紅,呢架專為城市駕駛設計嘅迷你車,直至1月底為止推出七個月內,已賣出超過160,000部,而且個數字完全係內銷,預計之後推其他亞洲市場,銷量會更進一步。 而1月份售出32,762架,唔止係首次成為全球第一,而且佔一月份新售出所有純電動汽車10%以上,唔怪得受外媒關注,而排第二位Tesla Model 3,賣出21,589輛,第三位係Tesla Model Y,9,597架。 同場加映:一月全球EV銷售排行榜 想知頭三位之後係乜嘢車?繼續睇落去。劇透一下,都係國產。 第四位:比亞迪Han EV售出9,298輛   第五位:長城ORA黑貓售出6,092輛。 第五位:GAC AION.S 同樣售出6,092輛。               而車廠品牌銷量排名榜,SGMW係1月份銷量贏家,售出38,896架,第二係Tesla,賣咗33,063架。跟住係寶馬,比亞迪,上汽,Mercedes奔馳及大眾Volkswagen。 一月份全球共售出321,031部電動汽車。嚟緊呢幾年,隨著各大車廠宣布加擴大電動車發展,相信排名會大執位。各車主及股民都要留意啦 ! 圖片及資料來源:ev-sales.blogspot.com, Driven, Electrek