[又威又唔使戴頭盔]電動三輪鐵騎 Nimbus Halo
[Bolt仔開心share]
個個都幻想過做鐵騎士，但香港濕熱嘅天氣 ，跟巴士尾、係隧道吸完廢氣、頭盔濕到一個點，想型唔係咁易，加上路窄車多，真係步步為營。想有電單車嘅理性，有汽車嘅安全，又有電動車嘅乾淨 ? 幫緊你！幫緊你！呢個出奇蛋可滿足你三個願望：Nimbus 推出嘅電動三輛電單車－Halo。
咪噓住 ! 我知我知 ! 近年市面已有好多三輪電單車，但呢架係有唔同 !
見開過D，無論係前二後單轆嘅Adiva，Yamaha Tricity、Piaggio MP3，定前單後兩個轆，都需要駕駛者平衡車身，而且雖然部份有車頂，但對司機保護有限。點解話Nimbus更安全，因為佢有自家平衡系統 「Nimbus Balance」，係靠一堆傳感器同執行器幫助機車轉彎傾斜嘅專有技術，Nimbus 創始人Nong 解釋 :
「Nimbus Balance完全係自家開發，同Piaggio MP3或Yamaha Tricity (前二後單嘅三輪車）之類基於電單車及踏板車嘅傾斜式機車完全不一樣。我哋嘅車由軚盤驅動，駕駛者無需轉向或平衡車輛。」
未完！Nimbus更承諾Halo配備3個SRS安全氣囊：正面及兩則窗旁簾式安全氣囊；仲有仲有 ! 自動泊車系統、自動緊急制動、ABS、牽引力控制、車道偏離警告、以及空中更新(over-the-air update)，揸電單車從未試過咁安全同咁多嘢玩！
Halo將配備3個安全氣袋，揸得更安心
Halo仲有好科幻嘅外殼保護駕駛者同乘客，由高強度鋼及鋁合金製成，唔只擋風擋雨雪同悪劣天氣，帶有熱塑性外殼，既輕身又安全，仲配備冷暖氣添 !! 呢個先係中點！比其他三輛電單車更保護之外，更爽！真正可以唔使戴頭盔 !
雖然Nimbus Halo有好多電動汽車功能，但車身絕對比到揸電單車feel， Nimbus Halo車頭好細，保留電單車質感，同樣有後座及儲物位，車身2.3米長，寬度僅有0.81米（31.9吋）。
咁規格點先？Nimbus車軚算狹窄，有真正空氣動力學特性；最高時速都有50 mph或每小時80 km，加強版X更高達90 mph或每小時145km 。因為氣流阻力細，Nimbus預計Halo將實現電耗370 MPGe， 即能源效益有 11 英里/ kWh (每百公里5.6 kWh )，非常不俗 (預訂超好反應嘅Aptera 三輛EV都係10英里/ kWh)。
車內小型電池組提供2個選擇：基本版 8.1 kWh，可以行駛126公里，重290公斤（639磅）。長續航版 12.4 kWh電池組，重量增加至315千克（695磅），續航里程為191公里。而充電時間，用level3快充只係45分鐘、level2亦已需1.2-1.8小時。.
定價方面，Nimbus Halo基本價格為6,420美元，已包標準嘅暖氣功能，藍牙喇叭及信息娛樂顯示屏，更可以選擇加冷氣及觸摸屏。
如果想試下揸，可以租，仲有兩個套餐揀：
- 一次過俾年費1,188美元，月租99美元。
- 比分兩次俾年費，每次774美元（共1548美元），月租129美元。包括使用充電器網絡及指定的免費停車服務
