今日Tesla被納入標準普爾500指數，而且將成為十大股值之一!!! 唔怪得電動車(EV)企業被看好 !
疫情以來好大多企業經營艱難，唯獨EV在股市就爆紅被力捧，成為熱門投資。有幾間電動車公司股價升幅更驚人屢創新高，成為財經股界焦點。Tesla十年內暴升10,800%就唔使多講，但股價已過四百美元實在好誇，今日想介紹嘅係另一美市焦點EV企業，係美國上市啱啱2年，股價升幅1000%，股價超越TESLA今年升幅，就係高檔電動汽車製造商「中國Nio蔚來汽車」。(戴返頭盔先，Bolt仔無持有以上提及的公司任何股票)
位於上海嘅Nio成立於2014年11月，屬於中國高端電動汽車市場嘅先驅，目前提供三款高端電動SUV: ES8，ES6和EC6，車價約人民幣37萬元起。
電池更換站 . 車同電池分開買
中國係全球最大電動車市場，但競爭慘烈，今年至少已有三間具規模嘅電動車初創敗走，Nio能脫穎而出一D都唔容易，佢嘅創新思維跳出框框，所以能突圍而出受美國財經界關注。好似Bolt仔曾介紹佢嘅電池更換服務站，呢個構思係2013年美國開發 : 架車駛到換電站，直接幫你換上已充爆嘅電池，過程全自動，只需3分鐘，快過入油 ! 唔洗花時間充電，亦唔需求擔心電池老化問題。
呢個model當年係美國推出反應好差，因為外國多數可以係屋企充電，而且不同車款有不同電池組，令電池更換站成本過高，而且美國地方大要建足夠換電站投資太大，所以慘敗收場。
而Nio情況不同，佢係製造EV同電池廠，所有車款用同款電池，而且同時提供車同電可分開買，令車價可平D，亦提供終身免費電力交換服務，成功吸引的士界使用。而且Nio掌握車主行車數據，所以換電服務站位置訂、及備用電池數量有更精準計算，成本資源運用更好。目前Nio在全中國擁有158個電池更換站覆蓋58個城市，已提供了超過118萬個電池更換服務，使用最多個架車已換電池超過500次 !!
>>>>>>>睇多D : 電池更換站post - 「Taxi電動化普及」要靠Tesla 7年前開發但唔受歡迎嘅方法 ?
簡約嘅Nio電池更換站可以整個搬走
電池可買可租 . 電池租用服務（BaaS）
Nio另一獨特創新服務，係消費者可以選擇傳統買車包電池，又或者，淨買車，電池唔買但租用。咁有乜好處? 首先，車價降低了約20％，配合今年8月公布嘅電池租用服務Battery as a Service（BaaS）- 俾客戶訂購汽車電池，而無需預先付費。例如買使用70 kWh電池嘅ES6，包電池價為358,000元人民幣。如果同時使用BaaS租電池，車價立減7萬人仔 ! 車主可由NIO和其電池供應商CATL新成立嘅合資企業分別租賃電池。70 kWh電池組月租費人仔980元。
另一好處係車主不必擔心電池容量損失安全性，並且令車主能夠在需要時租用更大嘅電池組，十分靈活，車主亦可以有得揀升級，好彈性 !! 例如租緊70 kWh電池組嘅，要長途旅行，只需支付當月嘅升級電池租金，係月費結束前交換返70WH就得。
新推出100 kWh電池
此外，11月Nio新推出100 kWh電池，新電池具有防傳播及高度集成的設計，全氣候熱力管理以及雙向雲電池管理系統（Battery Management System），另外借助電池到電池組（Cell To Pack）技術，能量密度提高了37％，100kWh電池令Nio的NEDC車輛續航里程可達615公里，高度集成設計使製造效率提高了40％，空間利用率都提高咗19.8％。
即時升級 換電就得
現有所有NIO車型車主：可以揀買或租用 1) 買新電池永遠升級 2) 平D可以租用: 費用人仔880元/月或7,980元/年。所有車主已經可即時預訂，即時升級只要換電唔洗換車。
新買配備100kWh電池嘅NIO車主 : 淨買車即減人民幣128,000元，租電池月租費為人仔1,480元。
Nio EC6 搭載100kWh電池 可買可租
呢種靈活彈性，又比車主以較低費用就可以隨時upgrade，確實慢慢令消費者接受，難怪上月公布比去年出車比同期增長100% ，抵佢兩年股價飆升1000%，價值仲已經超過美國汽車巨頭通用汽車。
資料及圖片來源: the Driven; Forbes; Motor 1.com; Nio news; ...
